दाना, १८ जेठ । म्याग्दीको अन्नपूर्ण गाउपालिका–३ मा रहेको दाना आयुर्वेद औषधालयको भवनमा आज बिहान आगोलागी भएको छ ।
आगोलागीबाट तीन कोठे भवन जलेर ध्वस्त भएको हो । एक तले भवनको पर्खाल समेत भत्किएको स्थानीयबासी इन्द्रसिंह शेरचनले बताए । स्थानीयबासीहरुले आगोलागी नियन्त्रणमा लिएका थिए । जिर्ण र भत्कने अवस्थामा पुगेको भवन केही वर्षदेखि प्रयोगमा थिएन् ।
भवनको एक वटा कोठामा मानसीक अवस्था ठिक नभएकी महिला बस्दै आएकी थिइन् । औषधालय भने केही वर्षयता दाना स्थित भाडाको घरबाट सञ्चालन गरिदै आएको थियो । भवनमा आगोलागी भएको विषयमा जानकारी गराएपनि दाना प्रहरी चौकी र औषधालयका कर्मचारीले वेवास्ता गरेका स्थानीयले गुनासो गरेका छन् ।
सोही जिर्ण भवन मर्मत र कम्पाउण्ड पर्खाल निर्माणमा अनियमिततामा भएपछि संलग्नलाई अख्तियार दुरुपयोग अनुसन्धान आयोगले विशेष अदालतमा यही जेठ ८ गते मुद्दा दायर भएको थियो ।
जिल्ला आयुर्वेद स्वास्थ्य केन्द्रका तत्कालीन निमित्त प्रमुख रमेश शर्मा भुषाल, दुई जना इञ्जिनियर र दुई जना निर्माण ब्यवसायी विरुद्ध मुद्दा चलाएको केही दिनमै भवनमा आगोलागी हुनमा शंका उब्जिएको स्थानीय गंगा पुनले बताए ।
भुषाल सहित भवन निर्माण विभाग डिभिजन कार्यालय, बागलुङ्गका तत्कालीन डिभिजन प्रमुख तेजेन्द्र शर्मा पौडेल र इन्जिनियर सुदिप खड्का, शुभकामना निर्माण सेवाको सञ्चालक सरिता सुवेदी र अधिकारनामा लिई निर्माण कार्यमा संलग्न रघुनाथ शर्मा विरुद्ध मुद्दा दायर भएको थियो ।
उनिहरुबिरुद्ध जनही रु. एक लाख ४५ हजार ९२८ का दरले बिगो दावी सहित मुद्दा चलाइएको अख्तियारले जनाएको छ । आर्थिक वर्ष २०७४÷७५ मा औषधालयको भवन मर्मत र घेराबार पर्खाल निर्माणमा खरिद प्रक्रिया विपरित मिलेमतो गरि अनियमितता भएको उजुरी परेको थियो ।
शुभकामना सहित झी र श्रमजीवी निर्माण सेवा गरी ३ वटा निर्माण व्यावसायीसँग कार्यालयले दरभाउपत्र माग गरेको देखाउन खोजेपनि निर्माण व्यावसायीहरूले पेश गरेको निवेदनको मिति तथा उक्त निवेदन कार्यालयमा दर्ता गर्दाको मितिहरूमा केरमेट र सच्चाइएको अनुसन्धानका क्रममा खुलेको थियो ।