यो सिजनको १५ औं आँधी फाक्साइले टोकियो सहित जापानको ठूलो क्षेत्रमा असर पुर्याउने सम्भावना बढेपछि जेआर इष्टले टोकियोको ठूलो क्षेत्रमा चल्ने रेलसेवा सोमबार विहानका लागि रद्द गर्ने जनाएको छ ।
जापानको मौषम एजेन्सीले आइतबारदेखिनै फाक्साईको प्रभावस्वरुप ठूलो मात्रामा बर्षा र हावाहुरी चल्ने बताएपश्चात सम्भावित खतराबाट जोगिन आफ्नो नियमित रेलसेवा रद्द गर्ने जेआर इष्टले जनाएको हो ।
रेलसेवा विहान ८ बजेसम्मका लागि बन्द रहने र रेल ट्रयाकहरुको चेकजाँचपश्चात ठीक भए सेवा सुचारु हुने श्रोतलाई उधृत गर्दै क्योदो न्यूजले जनाएको छ ।
टोकियोसहित कानागावा र साइतामा प्रिफेक्चरमा चल्ने आफ्ना रेल लाइनहरु पूर्णतया सुरक्षित रहने एकिन भएमा ८ बजेअघि नै पनि रेलसेवा सुरु गरिने बताइएको छ । तर ताइफुको प्रभाव ठूलो रहेमा र रेल ट्रयाकमा समस्या देखिएमा तोकिएभन्दा ढिलो सुचारु हुने सम्भावना रहेको पनि समाचारमा उल्लेख छ ।
तोहोकु, जोएचु र होकुरिकुमा चल्ने आफ्ना बुलेट ट्रेनहरुभने नियमितझै चल्ने जेआर इष्टले जानकारी दिएको छ ।
यता तोक्यु कर्पोरेसनले पूर्वि कानागावा र दक्षिणपश्चिमी टोकियोका विभिन्न भागमा चल्ने आफ्ना ८ लाइनहरु विहान रोक्नसक्ने सम्भावना रहेको बताएको छ । तोक्यु कर्पोरेशन अन्र्तगत चल्ने ति लाइनहरु टोकियोका विभिन्न भागससहित १०० किलोमिटरका ९७ स्टेशनहरुमा रोकिन्छन् ।
यो सिजनको १५ औ ताइफु कान्तो क्षेत्र तथा सिजुओका प्रिफेक्चरमा आइतबार राती र सोमबार विहानैको समयमा आइपुग्ने अनुमान छ । यसले २१६ किलोमिटर प्रतिघण्टा बराबर आँधी निम्त्याउने जापान मौषम एजेन्सीको अनुमान छ । यसले सोमबार दिउँसोदेखि २४ घण्टाभित्र जापानको मध्य तथा पूर्वी क्षेत्रमा २०० र ३०० मिलिमिटरसम्म बर्षा गराउने मौषमविद्हरुले बताएका छन् ।
भारी बर्षाका कारण केही स्थानहरुमा पहिरो जान सक्ने उच्च सम्भावना रहनुका साथै बाढी र शक्तिशाली हावा बहन बढ्न सक्ने जेएमएले चेतावनी दिएको छ । केही क्षेत्रमा मेघ गर्जनको समेत सम्भावना रहेको बताइएको छ भने भारी वर्षाको सम्भावना पनि उत्तिकै रहेकाले सचेत रहन चेतावनी जारी गरिएको छ ।
नेपाली इन जापान
